अगदी थोड्या वेळेसाठी..!

पाहता हे ढगाळलेले नभ

मिटून घेतोय पाकळी मी

मेहनतीने जपलेला गंध माझा

का लोटून द्यावा परक्यांच्या उन्मादी

...अगदी थोड्या वेळेसाठी !

वाऱ्याने सोडलाय लगाम

न करता कसलाही उत्पात

स्थीर होई पर्यंत याचा संताप

शहाण्याने आडोसा घ्यावा पानांच्या छप्परात

...अगदी थोड्या वेळेसाठी !

प्रकृती तितक्याच विकृती इथे

कुणा कुणाशी वैर करावे

जीवनाचे नाव संघर्ष असले तरी

प्रतिउत्तराने स्वतःवर घाव किती करावे

...अगदी थोड्या वेळेसाठी !

किती काळ तरेल वादळ हेही

उगवेल नवसूर्य पुन्हा याची मला हमी

पुन्हा बहरेन मी जोमाने अन् पूर्णत्वाने

सध्या परिक्षा फक्त माझ्या संयमाची

तेही ...अगदी थोड्या वेळेसाठी !